Mark 5
Iesu i Wuun ufu foron Tanwa Laulau koseng nenge Kaltu
(Mt 8:28�34; Lk 8:26�39)
1Namih ri ka masah na nenge bulin dan kawil na nanal ken fan Gerasa. 2Aunbiing Iesu ka wof puh tina mon, nenge kaltu ae tanwa laulau i susuef lo, ka suuh tina foron matanfat una luun minet ma ka tafe u. 3Kaltu ae i borong la na foron matanfat ae. Biil mang tikas i fasih in kabet u, taftawa le ini sen. 4Wara le ri kabet iun lima la ke iun keke la ini sen, isau le in tiifamut sen tina iun lima ke ik bayi aen tina iun keke. Biil tikas i fasih in famo u. 5Na foron wor ke na foron siat, i kiis la na foron matanfat ae, ke na foron pungpung. I ngangeh la ma ka kiitkiit fafis pununfo la tom ini fat.6Aunbiing i par pes Iesu tina tapak, ka filau, isi ke ka ilepul na mata. 7Ke ka tautau rakrakai aragii, “Iesu, Kalalik ke God buui kanaka na mawe! Sanih on tel u ini iau? Falimlim ini asa God le biil on to ta fangungut sing iau!” 8Ka use u arae, wara le Iesu ka fas ta u aragii, “Tanwa laulau, suuh koseng kaltu igii!”
9Ke Iesu ka diik u aragii, “Seh asam?”
Ka kiliis u aragii, “Asang e Legion, ▼ wara le kemem fuun.” 10Ma ka famam sising Iesu le gong i wuun ufu ri koseng falifuh ae.
11Nenge tara u na boh ri suupsuup la na baban nenge pungpung fatat. 12Ke foron tanwa laulau ae ri ka sising Iesu aragii, “Wuun ufu kemem una foron boh ae isi kemek susuef ulo ri.” 13Ke Iesu ka somangat ufu ri. Foron tanwa laulau ri ka la koseng kaltu ae, ke ri ka susuef una foron boh. Foron boh ae ri ka filau puh na nenge bolonfam una dan kawil ma ri ka kong. Wewes tikii na foron boh ae, i fasih aragii iwu e arip.
14Foron tom fofonoi na boh ri par sanih ae i tapiek tah, ke ri ka fin ma ri ka use u na tara maleh, ke na birbiron maleh. Ma fanu tikii ri ka la ma ri ka par sanih ae i tapiek tah. 15Aunbiing ri ka tapiek sing Iesu, ri ka par kaltu ae foron tanwa laulau ri susuef tah ulo ka kiis ta mang ini kaen na pununfo ma wolwol kia ka malal tikii. Ma ri ka sokeh tikii. 16Fanseh ae ri par ta sanih ae i tapiek tah, ri ka fas fanu tikii ini tier ae i tapiek tah lon kaltu ae tanwa laulau i susuef ta ulo. Ke ri ka fas ri sabin ini foron boh. 17Ri ka ongen u arae, ke ri ka sising Iesu isi in la koseng falifuh kiri.
18Aunbiing Iesu ka ier isi wof na mon, kaltu ae Iesu i tel ufu ta tanwa laulau lo, ka sising u le in la tura. 19Iesu biil i somangat pes u, isau le ka fas u aragii, “Fis una fel kiam, ma ok fas fanu lo wo ini foron tier laumet ae Kumguui i tel ta u lo wo, ma ini famais kia una aisam.” 20Ke kaltu ae ka la ma ka tipes fafas na Dekapolis ini sanih ae Iesu i tel ta u lo. Ma fanu tikii ri ka bitit.
Iesu i Faliu fafis nenge Keleflik, ke nenge Fifin ae i Sem Dah
(Mt 9:18�26; Lk 8:40�56)
21Iesu ka sopaket dan kawil sabin ini mon una nenge baba. Aunbiing i tinaiwa biitom na baban dan, nenge tara gur na fanu ri ka kawil u. 22Ke nenge famfamu tina felun lotu, asa e Jairus ka la unaiwa. Ka par Iesu ma ka ilepul na mata. 23Ma ka sising Iesu ini wolwol tikii kia aragii, “Fabiro keleflik kiak fatat ik met. Kiskam, la ma ok luun limam lo isi ik liu.” 24Ke Iesu ka la tura.Ma nenge tara gur na fanu ri ka mi lo, ke ri ka faruruh nami. 25Nenge fifin aiwa i sem dah i fasih aragii sangful ini u e bet. 26Fifin ae ka kalsakai ta piran fangungut na liman ifuun e dokta, ma ka farop tikii ta pitkalang kia, isi le in liu, isau le sasem kia ka laulaumet la. 27Ka ongen ta ususe lo Iesu, pesu ka sipsip solsol na fatpoton gur ae tina mi Iesu ma ka sigil boboh kia. 28Wara le i wol aragii, “Male ian sigil boboh kia sau, ke ian liu.” 29Aunbiing ka sigil boboh ke Iesu, fanpil dah ka mas. Ke ka usum le sasem kia ka rop.
30Fanpil, Iesu ka usum tah le, fal e rakrakai tina pununfo ka mangmangal tah koseng u. Ka giliim fis na fatpoton gur ae, ma ka diik aragii, “Seh i sigil boboh kiak?”
31Berberat na fafausum kia ri ka kiliis u aragii, “O par tara gur na fanu ri kawil o. Arafah o ka diik le, ‘Seh i sigil iau?’”
32Isau le Iesu ka parpar la biitom isi seh i sigil ta u. 33Fifin ae i usum na sanih i tapiek ta lo, ka lala sokeh ma ka nananar, ke ka ilepul na mata Iesu ke ka fas u ini foron tier tikii ae i tel ta u. 34Ke Iesu ka tara sing i aragii, “Keng keleflik, unune kiam i faliu wo. La ini siaroh, sasem kiam ka rop tah.”
35Aunbiing Iesu i ororek la biitom, ke fal e fanu ri ka la tina fel ke Jairus, famfamu tina felun lotu, ke ri ka tarah, “Kem keleflik ka met tah. Gong mang o fatel Tom Fafausum.”
36Isau le Iesu biil i wong sing ri, ka fas Jairus aragii, “Gong o sokeh. On unune sau.”
37Biil i somangat pes tikas in mi lo, Pita sau ke Jems ru latualik e Jon rituul mi lo. 38Aunbiing ri ka tapiek na fel ke Jairus, Iesu ka par maleh i rigorigo. Ma ka ongen fanu ri famam luluen. 39Ka kau ke ka tara sing ri aragii, “Isi sanih maleh ka rigorigo ma fanu ri ka luluen? Keleflik ae biil i to met, i masun sau.” 40Isau le ri ka yongne u.
Ka fasuuh fanu tikii, ke ka tel pes taman keleflik ae ru e tina turan berberat na fafausum sau ae ri la ta nami. Ri ka kau tura una falifuh ae keleflik ae i borong lo. 41Ka pose na lima ke ka tara sing i aragii, “Talita koum!” Kamtinan orek ae i tara aragii, “Lik, ia fas o, aptih!” 42Fanpil keleflik ae ka sotih ke ka la. Ma fanu ae ri par sanih ae i tapiek tah, ri ka lala bitit. Keleflik ae, i sangful ini u e bet kia. 43Ke Iesu ka fanau ri le gong ri fas tikas ini sanih ae i tapiek tah, ke ka fas ri sabin le rin fen keleflik ae ini ti fal e inen.
Copyright information for
TGG